ශ්‍රී ලංකාවේ චීන මහජන සමූහාණ්ඩුවේ තානාපති වෙයි හුආෂියං මහතා, මහජන ආරක්ෂක සහ පාර්ලිමේන්තු කටයුතු නියෝජ්‍ය අමාත්‍ය සුනිල් වටගල මහතා හමුවී සාකච්ඡාවක නිරත වී තිබේ. මහජන ආරක්ෂක සහ පාර්ලිමේන්තු කටයුතු අමාත්‍යාංශයේ දී මෙම හමුව සිදුව ඇත. එමෙන්ම මෙම හමුවේ දී විදුලි සංදේශ හා අන්තර්ජාලය ඔස්සේ සිදු කරන මූල්‍ය වංචා ඇතුළු අපරාධ මැඩලීම සඳහා ජාත්‍යන්තර සහයෝගීතාව ශක්තිමත් කිරීම පිළිබඳව විශේෂ අවධානය යොමු කර තිබේ. ශ්‍රී ලංකාව සහ චීනය අතර පවතින දිගුකාලීන මිත්‍රත්වය තහවුරු කරමින්, අන්තර්ජාල වංචා වැළැක්වීම සඳහා ඒකාබද්ධ ජාත්‍යන්තර ක්‍රියාමාර්ගයක අවශ්‍යතාව සහ එවැනි ජාත්‍යන්තර සන්ධානයකට ශ්‍රී ලංකාවේ සහභාගීත්වය ලබාගැනීමේ හැකියාව සම්බන්ධයෙන් ද සාකච්ඡා වී ඇත. නවීන උපකරණ සහ සුදුසු පුහුණු අවස්ථා ලබාදීම මගින් මහජන ආරක්ෂක සහ පාර්ලිමේන්තු කටයුතු අමාත්‍යාංශය, ශ්‍රී ලංකා පොලීසිය සහ ආගමන හා විගමන දෙපාර්තමේන්තුවේ ධාරිතාව ශක්තිමත් කිරීම කෙරෙහි ද අවධානය යොමුව තිබේ. මේ අතර මෙම සාකච්ඡාවේ දී ශ්‍රී ලංකා පොලීසියේ නිලධාරීන්ට සහ අමාත්‍යාංශයේ කාර්ය මණ්ඩලයට ශිෂ්‍යත්ව අවස්ථා ලබාදීමේ හැකියාවන් සොයා බැලීම සම්බන්ධයෙන් ද අවධානය යොමුව ඇත. අන්තර්ජාල වංචාවලින් මහජනතාව ආරක්ෂා කිරීම අරමුණු කර ගනිමින්, දෙරටටම අන්‍යෝන්‍ය ප්‍රතිලාභ සැලසෙන අයුරින් ද්විපාර්ශ්වික සහයෝගීතාව තවදුරටත් ශක්තිමත් කිරීමට මෙහිදී දෙපාර්ශ්වයම තම කැපවීම ප්‍රකාශ කර ඇති බව සඳහන්.