ලොහාන් බිරිය හත තෙක් රිමාන්ඩ්

කොටස් ගෙන්වා එකලස් කරන ලද රුපියල් කෝටි ගණනාවක් වටිනා අති සුඛෝභෝගී මෝටර් රථයක් නීති විරෝධී බව දැන දැන නිවස තුල සඟවාගෙන සිටීම සම්බන්ධයෙන් අත්අඩංගුවට ගැනීමට සොයමින් සිටියදී දින 10 කට පසු අධිකරණයට භාර වූ හිටපු රාජ්‍ය අමාත්‍ය ලොහාන් රත්වත්තේ මහතාගේ බිරිඳ අනිද්දා දක්වා රිමාන්ඩ් බාරයේ තබන්නැයි නුගේගොඩ, ගංගොඩවිල ප්‍රධාන මහේස්ත්‍රාත් රුවිනි ජයවර්ධන මහත්මිය නියෝග කළාය.

සැකකාර රශි පබා රත්වත්තේ මහත්මිය අත්අඩංගුවට ගැනීම සඳහා මිරිහාන මූලස්ථාන ප්‍රධාන පොලිස් පරීක්ෂක මංජුල තුෂාර මහතාගේ අධීක්ෂණය යටතේ විශේෂ පොලිස්‌ කණ්ඩායම් දෙකක්ද යොදවා තිබිණි.

නීති විරෝධී මෝටර් රථයට අදාළව ඉකුත් 31 වෙනිදින කටුගස්තොට නිවසේදී අත්අඩංගුවට ගත් හිටපු රාජ්‍ය අමාත්‍ය ලොහාන් රත්වත්තේ මහතා එදිනම නුගේගොඩ අධිකරණයේ අතිරේක මහේස්ත්‍රාත් සංජය විජේසිංහ මහතා හමුවට ඉදිරිපත් කිරීමෙන් අනතුරුව අනිද්දා 7 දක්වා රිමාන්ඩ් බන්ධනාගාර ගත කරන ලෙස නියෝග කළේය.

හිටපු රාජ්‍ය අමාත්‍යවරයාගේ බිරිඳ වන රශි පබා රත්වත්ත මහත්මියට අයත් මිරිහාන ඇඹුල් දිනය ශාලාව පාරේ නිවසේ ගරාජයක තිබී රුපියල් කෝටි ගණනාවක් වටිනා අති සුඛෝභෝගී මෝටර් රථය ඉකුත් 26 වෙනි පොලිස් භාරයට ගැනීමත් සමග රත්වත්ත පවුලම අතුරුදන්ව විය.