නා උයනේ අපවත් වූ විදෙස් හිමිවරුන්ගේ දේහ පශ්චාත් මරණ පරීක්ෂණවලින් පසු අදාළ රටවලට වැඩමකරවීමට සැලසුම්

කුරුණෑගල - මැල්සිරිපුර - පන්සියගම නාඋයන ආරණ්‍ය සේනාසනයේ අපවත් වූ විදෙස් හිමිවරුන්ගේ දේහ පශ්චාත් මරණ පරීක්ෂණවලින් පසු අදාළ රටවලට වැඩමකරවීමට සැලසුම් කර ඇති බව ශ්‍රී කල්යානී යෝගාශ්‍රම සංස්ථාවේ මහා ලේඛකාධිකාරී පූජ්‍ය කහගොල්ලේ සෝමවංශ හිමියන් ප්‍රකාශ කළා.

එමෙන්ම, අනතුරින් අපවත් වූ භික්ෂූන් වහන්සේගේ ආදාහන පූජෝත්සවයන් හෙට පස්වරු 01.30ට ආරණ්‍ය සේනාසනයේම සිදුකිරීමට නියමිතයි.

පෙරේදා රාත්‍රියේ භික්ෂූන් වහන්සේ 13 නමක් කේබල් ආධාරයෙන් ගමන් කරන ඩක්කුව භාවිත කරමින් භාවනා කුටි වෙත වැඩම කරමින් සිටියදී මෙම අනතුර සිදුව තිබූ අතර, එහි ගමන් කළ භික්ෂූන් වහන්සේ හත් නමක් අපවත් වුණා.

ඩක්කුවේ ආධාරකය යම් දෝෂයකට ලක්වී වේගයෙන් පහළට ඇදී ගොස් මෙම අනතුර සිදුව තිබෙනවා.

මූලික විමර්ශනවලදී අනාවරණය වී ඇත්තේ ධාරිතාව ඉක්මවා මෙම ඩක්කුවේ ගමන් කිරීම හේතුවෙන් මෙම අනතුර සිදුව ඇති බවටයි. අදාළ ඩක්කුවෙහි උපරිම ධාරිතාව කිලෝ 500 ලෙස සටහන් වී තිබෙනවා.

අනතුරින් තුවාල ලැබූ තවත් භික්ෂූන් වහන්සේ 06 නමක් කුරුණෑගල ශික්ෂණ රෝහලට ඇතුළත් කළ අතර, උන් වහන්සේ දෙනමකගේ තත්ත්වය බරපතල බව රෝහල් ආරංචි මාර්ග සඳහන් කළා.

අපවත් වූ භික්ෂුන් වහන්සේ අතර විදේශීය භික්ෂූන් වහන්සේ තුන් නමක්ද සිටිනවා.

මේ අතර අනතුර සිදුවූ ස්ථානයේ ස්ථානීය පරීක්ෂණය ඊයේ මහව මහේස්ත්‍රාත් කංචනී සෙනෙවිරත්න විසින් සිදුකළ අතර අනතුර සම්බන්ධයෙන් විධිමත් විමර්ශනයක් කර අධිකරණයට කරුණු වාර්තා කරන ලෙසයි මහේස්ත්‍රාත්වරිය පොලිසියට නියෝග කළේ.

ඒ සදහා යාන්ත්‍රික ඉංජිනේරුවරුන්ගේ සහය ලබාගන්නා ලෙසටද මහේස්ත්‍රාත්වරිය පොලිසියට නියෝග කළා.

එමෙන්ම මෙහිදී යම් අපරාධමය වරදක් සිදුවී ඇත්ද යන්න පිළිබඳවත් පූර්ණ විමර්ශනයක් සිදුකොට අධිකරණයට කරුණු වාර්තා කරන ලෙස මහේස්ත්‍රාත්වරිය වැඩිදුරටත් නියෝග කර තිබෙනවා.

අනතුරින් අපවත් වී සිටින භික්‍ෂූන් වහන්සේගේ මෘත දේහ සම්බන්ධයෙන් පශ්චාත් මරණ පරීක්‍ෂණ පවත්වා ඊට අදාළ පශ්චාත් මරණ පරීක්ෂණ වාර්තා වෙන් වෙන් වශයෙන් අධිකරණය හමුවට ඉදිරිපත් කරන ලෙසද මහේස්ත්‍රාත්වරිය කුරුණෑගල ශික්ෂණ රෝහලේ විශේෂඥ අධිකරණ වෛද්‍ය නිලධාරීවරයාට නියෝග කළා.

මේ අතර මෙම සිද්ධිය සම්බන්ධයෙන් හිටපු ජනාධිපතිවරුන් වන මහින්ද රාජපක්ෂ සහ රනිල් වික්‍රමසිංහද ශෝක පණිවුඩයක් නිකුත් කර තිබෙනවා.

එමෙන්ම අමාත්‍ය විජිත හේරත්ද සිද්ධිය සම්බන්ධයෙන් සිය එක්ස් ගිණුමේ සටහනක් තබමින් ශෝකය පළකළා.