රම්ප්ගේ ප්‍රකාශයත් සමග ආසියානු වෙළෙඳපොළේ බොරතෙල් මිල පහළට

ආසියානු වෙළෙඳපොළ තුළ අද (10) උදෑසන ගනුදෙනු ආරම්භයේදී බොරතෙල් මිල පහළ වැටී තිබේ.

බ්‍රෙන්ට් වර්ගයේ බොරතෙල් බැරලයක මිල 8.5%කින් පමණ පහළ වැටී ඩොලර් 92.50ක් ලෙස සටහන් වී ඇති බව වාර්තා වේ.

එමෙන්ම අමෙරිකානු වෙළෙඳපොළේ ද බොරතෙල් මිල ද 9% කින් පමණ පහළ ගොස් ඇති අතර එහි බැරලයක මිල ඩොලර් 88.60ක් ලෙස සටහන්ව ඇත.

මෙම මිල ගණන්, යුද්ධය ආරම්භ වූ අවස්ථාවේ පැවති මිලට වඩා 30%කින් පමණ ඉහළ මට්ටමක තවදුරටත් පවතී.

කෙසේවෙතත් තෙල් මිල මෙලෙස පහළ වැටී ඇත්තේ ''යුද්ධය ඉතා ඉක්මනින් අවසන් වනු ඇති බවට'' අමෙරිකානු ජනාධිපති ඩොනල්ඩ් ට්‍රම්ප් සිදු කළ ප්‍රකාශයත් සමඟිනි.

තෙල් මිල පහළ වැටීමත් සමඟ ආසියානු කොටස් වෙළෙඳපොළ තුළ නව උද්යෝගයක් ඇති වී තිබේ.

ඒ අනුව ජපානයේ 'Nikkei 225' දර්ශකය 2.8% කින් ද, දකුණු කොරියාවේ 'Kospi' දර්ශකය 5% කට වඩා වැඩි අගයකින් ද ඉහළ ගියේය.

ආසියානු කලාපයේ බොහෝ රටවල් ගල්ෆ් කලාපයෙන් තෙල් මිලදී ගන්නා ප්‍රධාන පාරිභෝගිකයන් වන බැවින්, මීට පෙර පැවති තෙල් මිල ඉහළ යාම එම වෙළෙඳපොළවල් වෙත දැඩි බලපෑමක් එල්ල කර තිබුණි.

මේ අතර ඊයේ (09) දිනයේ ලෝක වෙළඳපොළේ බොරතෙල් මිල 25% කට වඩා වැඩි ප්‍රමාණයකින් ඉහළ ගොස් තිබුණි.

එය 2022 වසරේ මැද භාගයෙන් පසු වාර්තා වූ ඉහළම මිල මට්ටම ලෙස ද විදෙස් මාධ්‍ය වාර්තා කළේය.

ඒ අනුව ඊයේ දිනයේ බ්‍රෙන්ට් වර්ගයේ බොරතෙල් මිල ඩොලර් 24.96කින් හෙවත් 27%කින් ඉහළ ගොස් බැරලයක මිල ඩොලර් 117.65 ක් ලෙස සටහන් විය.

මෙය ඉතිහාසයේ එක් දිනක් තුළ සිදුවූ විශාලතම මිල ඉහළ යාම ලෙසද සඳහන් විය.

එමෙන්ම අමෙරිකානු WTI බොරතෙල් මිල ද ඩොලර් 25.72 කින් හෙවත් 28.3% කින් ඉහළ ගොස් බැරලයක් ඩොලර් 116.62ක් දක්වා ඉහළ ගොස් තිබුණි.

එමෙන්ම වෙළෙදපලේ බොරතෙල් ගැටලුවට විසදුම් වශයෙන් ජාත්‍යන්තර බලශක්ති ඒජන්සිය හදිසි බොරතෙල් බැරල් මිලියන 300ක් මුදාහැරීමට යෝජනා කර ඇති බව වාර්තා වේ.

G7 රටවලට මුදල් අමාත්‍යවරුන් අතර පැවති සාකච්ඡාවකින් අනතුරුව මේ සම්බන්ධයෙන් යෝජනා වි ඇති බව විදෙස් මාධ්‍ය වාර්තා කර ඇත.

මේ වන විට ලෝක වෙළෙඳපොලේ බොරතෙල් බැරලයක මිල ඩොලර් 110ඉක්මවා ගොස් ඇති අතර මිල පාලනය කිරිම සහ ඉන්ධන හිගය මගහැරවීම සදහා මෙම තීරණය ගෙන ඇති බව සඳහන් වේ.